Clubo ne’e rasik hahu husi joventude sira, hanaran clubo FC MARACA, sigla refere conspirasaun husi foho tolu (Matebian, Ramelau, Cablaque), depois ida ne’e, joven sira reuni fila fali hodi muda sigla refere ba FC MARCA. Joventude sira nafatin diskute sigla ne’ebe furak liu, ho nune hetan referencia husi clubo ida iha SERIE A Italia ho naran AS. ROMA, razaun ne’e maka altera fila fali sigla clubo futebol (FC) ba Associação (AS). Associação Matebian Ramelau Cablaque (AS. MARCA) hanesan clubo futebol ida hahu husi 2006 husi joventude lubuk oan ida, ne’ebe hadomi futebol, no kria equipa ida husi joventude aldeia são josé no compostu husi Bairo Aimeti-Laran no Bairo Delta 4, ho objetivu atu participa competisaun sira ne’ebe realiza husi autoridade local sira. Infelizmente, la consegue registo tamba kauza husi krize politika iha 2006. Depois liu tiha tinan rua, iha 2008, iha competisaun ida ne’ebe realiza husi autoridade local aldeia são José, AS. MARCA existe fila fali hanesan clubo futebol ida nebe mos hakarak participa torneio refere, AS. MARCA marka istoria dahuluk ba vitoria campeaun iha torneio nivel aldeia. Iha 2011, AS. MARCA mos participa competisaun Taxa Preside Cup, infelizmente la consege ultrapasa iha faze knok out. Mezmu hetan derota, la hamihis vontade joventude sira nian atu continua atinje objetivo clubo ne’ebe hakarak participa iha competisaun nivel nacional nian. Ho razaun sira ne’e, maka iha 2012, continua partisipa iha competisaun Dom Bosco Cup ne’ebe realiza iha campo futebol comoro, joven sira ho antusiasmu no ho vontade tomak hakarak fo vitoria ba clubo rasik, felizmente consege duni vitoria ba primeiro lugar iha competisaun refere. Depois husi ne’e, nafatin participa iha torneio aldeia sira, no iha 2015, AS. MARCA ho vontade tomak simu convite ida atu bele participa iha competisaun ida husi comunidade Ailok-Laran, hodi ba participa iha torneio ka kompetisaun refere, iha torneio ne’e AS. MARCA continua hatudu nia performance iha jogu, no consege ultrapassa ba iha jogu Final hasoru clubo Carega-Tiru no derota iha faze penalty. Mezmu derota husi carega-Tiru, AS. MARCA la lakon ninia vontade, no continua organiza an hodi ba participa iha competisaun Copa 12 de Novembro. Entre 2015-2016 AS. MARCA hetan convite ida husi diresaun liga futebol Amadora atu halo preparasaun ba faze apuramentu. Maibe la consege participa tamba iha difikuldade interna iha clubo AS. MARCA. Iha 2017, joventude husi jogador AS. MARCA realiza fali torneio sub-14 iha campo futebol AS. MARCA, ho nune mak reuni fila fali joventude sira atu continua objetivo ne’ebe hakarak compete iha nivel nacional ou iha liga futebol. Iha 2018, continua organiza competisaun sub-20 iha competisaun nivel aldeia, hodi organija ka haforsa clubo AS. MARCA atu bele legaliza ninia estatuto hanesan clubo futebol ida. Ho vontade joventude sira ne’e, iha 2019, joventude sira mobiliza malu ka organiza an atu bele ba registo legalmente iha Notariado ho objetivo atu participa iha 3a divizaun liga futebol Amadora (LFA). Iha competisaun refere, consegue ultrapassa ba 2a divizaun LFA.
AS. MARCA hanesan clubo futebol ne’ebe iha ambisaun melhoria organizasaun Futebol iha ambitu formasaun Nacional no Internacional, hodi bele transforma dimensaun pessoal, social no profisional.
Forma atleta sira ho identidade no valor clubo nian, iha prioridade ba dezenvolvimentu global, iha nivel desportivo nacional, social no cultura. Hasae kresimentu atleta joven ne’ebe iha objetivu atu contribui ba desenvolvimentu futebol iha ita nia nasaun.